ក្រុមយុវជនមកពីសាកលវិទ្យាល័យមួយចំនួន បានប្រតិកម្មចំពោះអ្នកគ្រប់គ្រងសារមន្ទីរប្រល័យពូជសាសន៍ ឬគុកទួលស្លែង ដែលបានរារាំងពួកគេមិនឲ្យជួបជុំក្នុងកម្មសិក្សាមួយ ស្ដីពីការគិតស៊ីជម្រៅទៅលើរបបកម្ពុជាប្រជាធិបតេយ្យ។
យុវជនមកពីសាកលវិទ្យាល័យភូមិន្ទភ្នំពេញ លោក គួយ កក្កដា បានថ្លែងថា ពួកគេជានិស្សិតចំនួន ២២នាក់មកពីសាកលវិទ្យាល័យចំនួន ៦ បន្ទាប់ពីបានទទួលវគ្គសិក្សាខ្លីរបស់អង្គការកម្មវិធីអភិវឌ្ឍន៍ធនធានយុវជន ហៅថា វាយ.អា.ឌី.ភី (YRDP) ចំនួន ២ថ្ងៃមក នៅថ្ងៃទី១៩ កុម្ភៈ ពួកគេបានទៅជួបជុំគ្នាទស្សនកិច្ចដោយផ្ទាល់នៅសារមន្ទីរប្រល័យពូជសាសន៍ ឬគុកទួលស្លែង ប៉ុន្តែកំពុងជួបជុំនោះត្រូវបានលោក កេ សុបណ្ណការ ប្រធានសារមន្ទីរទួលស្លែង មករារាំងតម្រូវឲ្យពួកគេសុំច្បាប់ជាមុនសិន ព្រោះទាក់ទងនឹងការជួបជុំ។ ពួកគេមានការងឿងឆ្ងល់ថា មានហេតុផលអ្វីបានជានាំឲ្យមានការហាមប្រាមមិនឲ្យយុវជនជួបជុំនិយាយពីរឿងប្រវត្តិសាស្ត្រក្នុងសារមន្ទីរនេះ។
ឆ្លើយតបបញ្ហានេះ ប្រធានសារមន្ទីរប្រល័យពូជសាសន៍ ស.២១ លោក កេ សុបណ្ណការ បានបកស្រាយថា នេះមិនមែនជាការបំបិទសិទ្ធិសេរីភាពបញ្ចេញមតិរបស់ពលរដ្ឋនោះទេ។ លោកថា រាល់ការជួបជុំថតវីដេអូទាំងអស់ ត្រូវមានច្បាប់អនុញ្ញាតពីក្រសួងវប្បធម៌ជាមុនសិន ជៀសវាងការប្រាសចាកនឹងប្រវត្តិសាស្ត្រ៕
No comments :
Post a Comment