រាជធានីភ្នំពេញ ៖ ក្រសួងសុខាភិបាល និងអង្គការសុខភាពពិភពលោក (WHO) រកឃើញករណីថ្មីនៃជំងឺផ្តាសាយបក្សី (H5N1) កើតឡើងនៅខេត្តក្រចេះ ដែលនេះជាករណីទីបីហើយសម្រាប់ឆ្នាំ២០១៤នេះ។
សេចក្តីប្រកាសព័ត៌មានរបស់ក្រសួង ចេញផ្សាយនៅថ្ងៃពុធនេះ ឲ្យដឹងថា ករណីទីបីនេះ កើតលើកុមារាម្នាក់ អាយុ៤ឆ្នាំ ដែលមានទីលំនៅក្នុងភូមិក្បាលត្រាច ឃុំស្រែចា ស្រុកស្នួល ខេត្តក្រចេះ។ កុមារ ត្រូវបានបញ្ជាក់ដោយវិទ្យាស្ថានប៉ាស្ទ័រកម្ពុជា នៅថ្ងៃទី១៤ខែកុម្ភៈ ថាមានជំងឺផ្តាសាយបក្សី។
កុមារ កំពុងសម្រាកនៅមន្ទីរពេទ្យបង្អែកខេត្តក្រចេះ និងបានទទួលការព្យាបាលដោយឱសថTamiflu។ កុមារមានរោគសញ្ញា មិនសូវធ្ងន់ធ្ងរទេ ហើយបច្ចុប្បន្ន កុមារមានស្ថានភាពសុខភាពល្អ។
ក្រសួងសុខាភិបាល ឲ្យដឹងទៀតថា កុមារ បានប៉ះពាល់ជាមួយបក្សីឈឺ និងងាប់។កុមារ បានលេង និងកាន់មាន់ងាប់អំឡុងពេល៦ថ្ងៃ មុនកុមារ មានរោគសញ្ញា។ ប្រហែលនៅពាក់កណ្តាលខែមករា មានបសុបក្សីជាច្រើន(មាន់ ទា ក្ងាន)ចាប់ផ្តើមងាប់ក្នុងភូមិ(ប្រហែល៥០ក្បាល)។
ករណីជំងឺផ្តាសាយបក្សីទីបីនេះ ជាករណីទី៥០ហើយនៃជំងឺផ្តាសាយបក្សីនៅប្រទេសកម្ពុជា ហើយ៣៨ករណីក្នុងចំណោមនោះ កើតឡើងកុមារអាយុក្រោម១៤ឆ្នាំ និង២៧ករណីក្នុងចំណោម៥០ករណី កើតលើនារី។១៦ករណីក្នុងចំណោម៥០ករណី អ្នកជំងឺនៅមានជីវិត។
គួររំលឹកដែរថា កាលពីថ្ងៃទី០៧ខែកុម្ភៈ ជំងឺផ្តាសាយបក្សី H5N1 បានបណ្តាលឲ្យកុមារាម្នាក់ អាយុ៨ឆ្នាំម្នាក់ រស់នៅក្នុងភូមិក្បាលត្រាច ឃុំស្រែចា ស្រុកស្នួល ខេត្តក្រចេះ ស្លាប់។ ជំងឺផ្តាសាយបក្សី H5N1 គឺជាជំងឺផ្តាសាយមួយដែលជាធម្មតាចម្លងរវាងសត្វបក្សីឈឺ ទៅបក្សីផ្សេងៗទៀត ប៉ុន្តែជួនកាលវាចម្លងពីបក្សីទៅមនុស្ស។ ជំងឺផ្តាសាយបក្សីលើមនុស្ស ជាជំងឺធ្ងន់ធ្ងរ ដែលតម្រូវឲ្យមានការព្យាបាលនៅមន្ទីរពេទ្យ។ ទោះបីជាវាមិនងាយឆ្លងពីមនុស្សម្នាក់ទៅមនុស្សម្នាក់ទៀត ប៉ុន្តែបើវាផ្លាស់ប្តូរ វានឹងអាចរាលដាល ដូចនឹងជំងឺផ្តាសាយតាមរដូងកាល៕
No comments :
Post a Comment