រាជធានីភ្នំពេញ៖ គណបក្សប្រជាជនកម្ពុជា បានចេញសេចក្តីជូនដំណឹងថា កិច្ចប្រជុំចរចាជាថ្មី រវាងក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ និយាយពីយន្តការរៀបចំកំណែទម្រង់ការបោះឆ្នោត នឹងធ្វើឡើងនៅម៉ោង ៩ :០០ព្រឹក ថ្ងៃទី១៨កុម្ភៈ ឆ្នាំ២០១៤នៅវិមានព្រឹទ្ធសភា។ ក្រុមការងារគណបក្សប្រជាជនកម្ពុជា មាន ៣ រូប គឺលោក ព្រុំសុខា លោក សក់សេដ្ឋា និងលោកកើតរិទ្ធ។
លោក យឹម សុវណ្ណ អ្នកនាំពាក្សគណបក្សសង្គ្រោះជាតិបានឲ្យដឹងនៅរសៀលថ្ងៃទី១៥ ខែកុម្ភៈនេះថា តំណាង គណបក្សសង្គ្រោះជាតិ សម្រាប់់ការចរចានៅថ្ងៃទី១៨ ខែកុម្ភៈ ជាមួយគណបក្សប្រជាជនកម្ពុជា រួមមាន លោក សុន ឆ័យ ,លោក គួយ ប៊ុនរឿន និងលោក យ៉ែម ប៉ុញ្ញរិទ្ធ។
លោក យឹម សុវណ្ណ បានបញ្ជាក់បន្តថា នៅក្នុងជំនួបនៅថ្ងៃទី១៨ ខែកុម្ភៈនោះ គណបក្សសង្គ្រោះជាតិ បានបញ្ជាក់រួចហើយ គឺពិភាក្សាពីកំណែ ទម្រង់ ស្ថាប័នបោះឆ្នោត កំណែទម្រង់ស្ថាប័នជាតិសំខាន់ៗមួយចំនួន។ លោកបន្តថា បើសិនជាជំនួបក្រុមការងារបច្ចេកទេសនៃគណបក្សទាំងពីរមានលទ្ធផលល្អ នោះអាចនិងមានជំនួបកំពូល នៃថ្នាក់ដឹកនាំ គណបក្សនយោបាយទាំងពីរ នៅពេលបន្ទាប់។ លោកបញ្ជាក់ទៀតថា គណបក្សសង្គ្រោះជាតិគោរពតាមឆន្ទៈប្រជាពលរដ្ឋម្ចាស់ឆ្នោត។
តាមសេចក្តីជូនដំណឹងរបស់គណបក្សប្រជាជនកម្ពុជា ចុះថ្ងៃទី១៥ ខែកុម្ភៈ ឆ្នាំ២០១៤ បង្ហាញថា គណបក្សប្រជាជនកម្ពុជា សូមជម្រាបជូនសាធារណៈមតិជាតិ និងអន្តរជាតិ មេត្តាជ្រាបថា ដូចដែលបានជូនដំណឹងកន្លងទៅ គណបក្សប្រជាជនកម្ពុជា ត្រៀមខ្លួនរួចជាស្រេច ជួបចរចាជាមួយគណបក្សសង្គ្រោះជាតិ ដើម្បីរៀបចំបង្កើតយន្តការកំណែទម្រង់ការបោះឆ្នោត នាពេលខាងមុខ ស្របតាមស្មារតីសេចក្តីប្រកាសរួម នៃជំនួបកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ នាថ្ងៃទី១៦ ខែកញ្ញា ឆ្នាំ២០១៣។
សេចក្តីជូនដំណឹងដដែល បញ្ជាក់ថា ឆ្លើយតបចំពោះសេចក្តីថ្លែងការណ៍ ថ្ងៃទី១៤ ខែកុម្ភៈ ឆ្នាំ២០១៤ របស់គណបក្សសង្គ្រោះជាតិ គណបក្សប្រជាជនកម្ពុជា សូមកំណត់យកថ្ងៃទី១៨ ខែកុម្ភៈ ឆ្នាំ២០១៤ វេលាម៉ោង ៩ ព្រឹក នៅវិមានព្រឹទ្ធសភា សម្រាប់ជួបគ្នា រវាងក្រុមការងារគណបក្សទាំងពីរ។ សមាសភាពក្រុមការងាររបស់គណបក្សប្រជាជនកម្ពុជា រួមមានៈ លោក ព្រុំ សុខា, លោក សក់ សេដ្ឋា និងលោក កើត រិទ្ធ៕
No comments :
Post a Comment