ភ្នំពេញ: ទោះបីជាមានការយាយីរំខានយ៉ាងណាក៏ដោយ ក៏នៅព្រឹកថ្ងៃចន្ទ ទី២៧មករានេះ លោក កឹមសុខា ប្រធានស្តីទីគណបក្សសង្គ្រោះជាតិ បានប្រកាសថា នឹងធ្វើដំណើរចេញពីភ្នំពេញ ទៅចូលរួមពិធីជួបជុំសកម្មជនរបស់គណបក្សសង្គ្រោះជាតិ នៅខាងត្បូងសាលាអនុវិទ្យាល័យ ទួលដំណាក់ ក្នុងឃុំចុងដូង ស្រុកបារាយ ខេត្តកំពង់ធំ។ ប៉ុន្តែកាលពីថ្ងៃអាទិត្យម្សិលមិញ អាជ្ញាធរខេត្តកំពង់ធំ មិនអនុញ្ញាតឲ្យគណបក្សសង្គ្រោះជាតិ រៀបចំពិធីជួបជុំនោះទេ។
សូមរម្លឹកថា ប្រធានស្តីទីគណបក្សសង្គ្រោះជាតិ លោក កឹម សុខា ត្រូវបានអ្នកគាំទ្រគណបក្សប្រជាជនកម្ពុជាជាច្រើនរយនាក់ បានឡោមព័ទ្ធសណ្ឋាគារស្នាក់នៅក្នុងខេត្តកំពង់ចាម កាលពីព្រឹកថ្ងៃអាទិត្យម្សិលមិញ។
អ្នកឡោមព័ទ្ធទាំងនោះ បានស្រែកគាំទ្ររដ្ឋាភិបាលរបស់សម្តេចនាយករដ្ឋមន្ត្រីហ៊ុនសែន និងគាំទ្រលទ្ធផលបោះឆ្នោត កាលពីថ្ងៃទី២៨កក្កដា ឆ្នាំ២០១៣ ហើយថា កម្ពុជា មិនត្រូវការលោកសមរង្ស៊ី និងលោកកឹមសុខានោះទេ។ គណបក្សសង្គ្រោះជាតិ បានអះអាងថា ការតាមរំខានដល់សកម្មភាពគណបក្សសង្គ្រោះជាតិ គឺជារឿងខុសច្បាប់។
Read More >>>
No comments :
Post a Comment