ខ្សែបម្រើជម្រើសជាតិជប៉ុន Keisuke Honda បានស៊ុតគ្រាប់ដំបូងរបស់ខ្លួនឲ្យក្រុម AC Milan យកឈ្នះ Spezia ៣-១ នៅក្នុងវគ្គ១៦ក្រុមចុងក្រោយនៃពាន Coppa Italia យប់មិញនេះ។ ជាមួយគ្នានោះ ម្ចាស់ពាន FIFA Ballon d’Or 2013, Cristiano Ronaldo ក៏បានស៊ុតបាល់ហ្រ្វីឃីក១គ្រាប់ឲ្យ Real Madrid យកឈ្នះ Osasuna ២-០ ក្នុងជើងទី២នៃវគ្គ១៦ក្រុមចុងក្រោយ Copa del Rey ផងដែរ។
Honda អបអរក្រោយស៊ុតបញ្ចូលទី (រូបលើ) , Ronaldo អបអរជាមួយមិត្តរួមក្រុម (រូបក្រោម)
ក្រុម AC Milan ដែលទើបតែងតាំងគ្រូបង្វឹកថ្មី Clarence Seedorf បាននាំមុខ ២-០ មុននៅតង់ទី១ ធ្វើបានដោយ Robinho និង Pazzini មុនពេល Honda បន្ថែមគ្រាប់ទី៣នៅដើមតង់ទី២។ នៅជិតចប់ការប្រកួត ក្រុមមកពីក្របខ័ណ្ឌលំដាប់ទី២របស់អ៊ីតាលី Spezia បានសង១គ្រាប់វិញផងដែរ ដោយកីឡាករ Ferrari។
ក្រោយជ័យជម្នះនេះ AC Milan នឹងត្រូវឡើងទៅជួប Udinese នៅវគ្គ៨ក្រុមចុងក្រោយ។ ៦ក្រុមផ្សេងទៀតដែលឡើងទៅវគ្គ៨ក្រុមចុងក្រោយដែរនោះ គឺ Napoli ប៉ះ Lazio, Fiorentina ជួប Siena និង Juventus ជួបគូប្រជែង Roma។
Honda (លេខ១០) និង Robinho
ងាកទៅអេស្ប៉ាញវិញ Ronaldo បានស៊ុតហ្រ្វីឃីកឲ្យ Real Madrid នាំមុខ Osasuna មុននៅនាទី២១ មុនពេល Di Maria បន្ថែមគ្រាប់ទី២ នៅ១០នាទីដើមតង់ទី២ ដែលធ្វើឲ្យស្ដេចស ឈ្នះក្នុងលទ្ធផលសរុបទាំងពីរជើង ៤-០។ ក្រុមលោក Carlo Ancelotti ក៏បាត់បង់កីឡាករម្នាក់ដែរ ក្រោយ Fabio Coentrao ទទួលកាតលឿងលើកទី២នៅ៥នាទីមុនចប់ការប្រកួត។
Real នឹងត្រូវឡើងទៅប៉ះ Athletic Bilbao នៅវគ្គ៨ក្រុមចុងក្រោយ ខណៈ Barcelona ដែលត្រូវប្រកួតយប់នេះ ក៏មានសង្ឃឹមខ្ពស់ថានឹងឡើងទៅដែរ ក្រោយនាំមុខ Getafe ៤-០ នៅជើងទី១ទៅហើយនោះ៕
Ronaldo បណ្ដើរបាល់គេចខ្សែការពារ៣នាក់របស់ Osasuna
មើលវីដេអូជ័យជម្នះរបស់ AC Milan និង Real Madrid ខាងក្រោមនេះ៖
No comments :
Post a Comment