កីឡាករ​​ល្បី​​ទាំង​៨​ ​ដែល​នឹង​ចប់​កុងត្រា​ក្នុង​ឆ្នាំ​២០១៤​នេះ

មាន​កីឡាករ​ជា​ច្រើន​ដែល​នឹង​ផុត​កុងត្រា​នៅ​ក្លិប​ដែល​ខ្លួន​កំពុង​លេង​ ​ហើយ​ក្លាយ​ជា​កីឡាករ​ដែល​គ្មាន​តម្លៃ​ខ្លួន (free agent) ក្នុង​ឆ្នាំ​២០១៤​នេះ​។ ក្នុង​នោះ​ក៏​មាន​កីឡាករ​ល្បី​ឈ្មោះ​មួយ​ចំនួន​ផង​ដែរ ដូច​មាន​​ខាង​ក្រោម​នេះ៖

១. Andrea Pirlo

ខ្សែ​បម្រើ​ឆ្នើម Andrea Pirlo នឹង​ត្រូវ​ផុត​កុងត្រា​នៅ​ក្លិប​សេះ​បង្កង់​ Juventus នា​ឆ្នាំ​២០១៤​នេះ​ហើយ។ ទោះ​ជា​មាន​វ័យ​៣៤ឆ្នាំ​ទៅ​ហើយ​ក៏​ដោយ ក៏​មាន​បណ្ដាញ​សារព័ត៌មាន​មួយ​ចំនួន​រាយការណ៍​ថា​កីឡាករ​អ៊ីតាលី​រូប​នេះ ត្រៀម​បន្ត​កុងត្រា​ថ្មី​របស់​ខ្លួន​នៅ​ដំណាច់​ខែ​មករា​នេះ​ហើយ។ ក្លិប Arsenal និង Chelsea ក៏​ត្រូវ​បាន​គេ​រាយការណ៍​ថា​កំពុង​ចាប់​អារម្មណ៍​លើ​ Pirlo ​ដែរ។

២- Victor Valdes

ផ្ទុយ​ពី Pirlo ដែល​គ្រោង​នឹង​បន្ត​កុងត្រា​ថ្មី អ្នក​ចាំ​ទី Victor Valdes ទំនង​ជា​មិន​បន្ត​កុងត្រា​នៅ​ក្លិប​អ្នក​មាន​បុណ្យ Barcelona នោះ​ទេ។ Manchester City របស់​អង់គ្លេស ក៏​ដូច​ជា​ក្លិប Monaco របស់​បារាំង កំពុង​​ចង់​បាន​អ្នក​ចាំ​ទី​អេស្ប៉ាញ​នេះ​ដូច​គ្នា។

៣- Ashley Cole

Ashley Cole ត្រូវ​បាន​គេ​រំពឹង​ថា​នឹង​ចុះ​កុងត្រា​ថ្មី​នៅ Chelsea កាល​ពី​ចុង​ឆ្នាំ​២០១៣ ប៉ុន្តែ​ឈាន​ដល់​២០១៤​នេះ នៅ​មិន​ទាន់​មាន​កុងត្រា​ថ្មី​សម្រាប់​ខ្សែ​ការពារ​អង់គ្លេស​រូប​នេះ​នៅ​ឡើយ​ទេ។ អ្វីៗ​នៅ​មិន​ទាន់​ប្រាកដ​នៅ​ឡើយ​ទេ​ ដោយ​សារ​​តោ​ខៀវ​នៅ​មាន​ខ្សែ​ការពារ​ឆ្វេង​ល្អ​ម្នាក់​ទៀត​គឺ Cesar Azpilicueta។ របាយការណ៍​ពី Goal.com បាន​ឲ្យ​ដឹង​ថា Cole មិន​ទាន់​​បាន​កុងត្រា​ថ្មី ដោយ​សារ​រូប​គេ​បាន​បដិសេធ​មិន​ទទួល​យក​ប្រាក់​បៀវត្ស​ទាប​ជាង​មុន (១៥ម៉ឺន​ផោន​ក្នុង​មួយ​សប្ដាហ៍)។

៤- Nemanja Vidic

ប្រភព​ពី Daily Mirror បាន​ឲ្យ​ដឹង​ថា Manchester United ត្រៀម​ផ្ដល់​ឲ្យ​ខ្សែ​ការពារ​​ប្រធាន​ក្រុម​រូប​នេះ​នូវ​កិច្ចសន្យា​ថ្មី​បន្ថែម​១២ខែទៀត។ យ៉ាង​ណា​ក្ដី ទីភ្នាក់ងារ​របស់ Vidic ធ្លាប់​បាន​ប្រាប់​កន្លង​មក​ថា កីឡាករ​វ័យ​៣២ឆ្នាំ​រូប​នេះ ទំនង​ជា​មិន​បន្ត​កុងត្រា​ថ្មី​នោះ​ទេ ស្រប​ពេល​មាន​ក្លិប​មួយ​ចំនួន​កំពុង​ចង់​បាន​រូប​គេ ដូច​ជា Monaco និង Galatasaray ជា​ដើម។

៥- Didier Drogba

ទោះ​បី​ជា​ក្លិប​យក្ស​ទួរគី Galatasaray ព្យាយាម​រក្សា​ Drogba យ៉ាង​ណា​ក្ដី ក៏​ខ្សែ​ប្រយុទ្ធ​រូប​នេះ​ទំនង​ជា​មិន​បន្ត​កុងត្រា​ថ្មី​នោះ​ទេ។ ក្លិប New York Red Bulls របស់​សហរដ្ឋ​អាមេរិក​​បាន​ត្រៀម​រួច​ជា​ស្រេច នៅ​ពេល​កិច្ច​សន្យា​របស់​កីឡាករ​កូឌីវ័រ​ វ័យ​៣៤​ឆ្នាំ​រូ​បនេះ ​ចប់​​​នៅ​ដំណាច់​រដូវ​កាល​នេះ។

៦- Patrice Evra

Manchester United កំពុង​ត្រៀម​បន្ត​កុងត្រា​ថ្មី​ឲ្យ Evra មុន​ពេល​កិច្ច​សន្យា​បច្ចុប្បន្ន​ត្រូវ​ចប់​នៅ​រដូវ​ក្ដៅ​ខាង​មុខ។ ខណៈ​មាន​ក្លិប​អ្នក​មាន​មួយ​ចំនួន​កំពុង​លេប​ទឹក​មាត់​ចង់​បាន​ខ្សែ​ការពារ​បារាំង​រូបនេះ បិសាច​ក្រហម​មិន​ប្រាកដ​ថា​អាច​រក្សា​ Evra បាន​ឡើយ។ Monaco ជា​ក្លិប​មុន​ដំបូង​គេ ដែល​ត្រៀម​រួច​ជា​ស្រេច​ក្នុង​ការ​ទទួល​យក Evra ទៅ​បារាំង​វិញ។

៧- Samuel Eto’o

Eto’o ជា​កីឡាករ​ដែល Chelsea ទិញ​យក​មក​បន្ថែម​​ក្នុង​តំបន់​ប្រយុទ្ធ​របស់​ខ្លួន​កាល​ពី​​ដើម​រដូវ​កាល​កន្លង​ទៅ។ ទោះ​បី​ជា​អាច​ជះ​ឥទ្ធិពល​តិច​តួច​នៅ​ក្រុម​លោក Mourinho ក៏​ពិត​មែន ក៏​អតីត​កីឡាករ​ល្បី​នៅ​ Barcelona រូប​នេះ នឹង​ត្រូវ​ចាកចេញ​ពី​អង់គ្លេស​ក្រោយ​ចប់​រដូវ​កាល​នេះ​ទេ។ ក្លិប​នៅ​អាមេរិក​មួយ​ចំនួន ក៏​កំពុង​ចង់​បាន​ Eto’o ដែរ ដូច​ជា​ Los Angeles Galaxy និង DC United ជា​ដើម។

៨- John Terry

Terry ក៏​ត្រូវ​ចប់​កុងត្រា​ក្នុង​ឆ្នាំ​២០១៤​នេះ​ដែរ។ អតីត​ខ្សែ​ការពារ​ប្រធាន​ក្រុម​ជម្រើស​ជាតិ​អង់គ្លេស​រូប​នេះ នៅ​តែ​បង្ហាញ​ទម្រង់​លេង​យ៉ាង​ល្អ​ក្នុង​នាម​ជា​ខ្សែ​ការពារ​កណ្ដាល ទោះ​ឈាន​ដល់​វ័យ​ ៣៣ឆ្នាំ​ហើយ​ក៏​ដោយ។ យ៉ាង​ណា​ក្ដី នៅ​មិន​ទាន់​ច្បាស់​នៅ​ឡើយ​ទេ​ ថា​តើ Chelsea នឹង​ផ្ដល់​កុងត្រា​ថ្មី​ឲ្យ​ Terry ឬ​ក៏​អត់។

ក្រៅ​ពី​កីឡាករ​ទាំង​៨​ខាង​លើ​នេះ ក៏​នៅ​មាន​កីឡាករ​ជា​ច្រើន​ទៀត​ដែល​នឹង​ត្រូវ​ចប់​កុងត្រា​នៅ​ក្លិប​របស់​ខ្លួន​ក្នុង​ឆ្នាំ​២០១៤​នេះ។ កីឡាករ​ទាំង​នោះ​មាន​ដូច​ជា Ola Toivonen (PSV), Diego (Wolfsburg), Jeremy Menez (PSG), Mame Biram Diouf (Hannover), Younes Kaboul (Man City), Bacary Sagna (Arsenal), Bafetimbi Gomis (Lyon), Fernando (Porto), Igor Akinfeev (CSKA Moscow) និង Blaise Matuidi (PSG) ជា​ដើម៕