លោក​ Clarence Seedorf ​មិន​អាច​ទប់​ទឹកភ្នែក​របស់​ខ្លួន​ក្នុង​អារម្មណ៍​ដ៏​រំជើបរំជួល​បាន​ឡើយ​នៅ ​ពេល​ទទួល​ការ​បញ្ជាក់​ជា​ផ្លូវការ​ថា​លោក​គឺ​ជា​គ្រូ​បង្គោល​ថ្មី​របស់​ ក្លិប​ AC Milan ​ជំនួស​លោក​ Massimiliano Allegri ​ដែល​ត្រូវ​បាន​ដក​ចេញ​ពី​តំណែង​កាល​ពី​ថ្ងៃ​ចន្ទ។​
អតីត​ខ្សែ​បម្រើ​ឆ្នើម​​នៃ​ក្រុម​ជម្រើស​ ជាតិ​ហុល្លង់​វ័យ​៣៧​ឆ្នាំ​រូប​នេះ​​ប្រាប់​អ្នកសារព័ត៌មាន​នៅ​ក្នុង​ ទីក្រុង​ Rio de Janeiro ​ប្រទេស​ប្រេស៊ីល​ម្សិលមិញ​ថា​លោក​បញ្ចប់​អាជីព​ពី​​កីឡាករ​ជា​ផ្លូវការ​ហើយ ​ក្រោយ​ចំណាយ​ពេល​១៨​ខែ​លេង​ឱ្យ​ក្រុម​ Botafogo។​
គ្រូ​បង្វឹក​ក្រុម Botafogo សម្រួល​អារម្មណ៍ Seedorf ​ដែល​រំជើបរំជួល​
កីឡាករ​បាល់ទាត់​ដំបូង​គេ​ដែល​ឈ្នះ​ជើងឯក​ UEFA Champions League ​៤​ដង​នៅ​៣​ក្លិប​ផ្សេង​គ្នា​​(ជាមួយ Ajax ឆ្នាំ​១៩៩៥, Real Madrid ឆ្នាំ១៩៩៨, AC Milan ឆ្នាំ​២០០៣​និង​២០០៧) ​និយាយ​ថា​៖ “ជំហាន​បន្ទាប់​សម្រាប់​ខ្ញុំ​គឺ​ធ្វើ​ជា​គ្រូ​បង្វឹក​ក្រុម​ AC Milan”។ ​ក្នុង​ពិធី​លា​គ្នា​​ពី​ក្លិប​និង​មិត្ត​រួម​ក្រុម​នៅ Botafogo ​ ​អតីត​សមាជិក​ក្លិប​ Ajax, Sampdoria, Real Madrid, Inter Milan ​បន្ថែម​ថា​៖ “នៅ​ក្នុង​ឆាក​ជីវិត​ ​ពេល​ឱកាស​មក​ដល់​យើង​ត្រូវ​តែ​ចាប់​យក។ បាល់ទាត់​ផ្ដល់​ឱកាស​ជា​ច្រើន​ដល់​យើង​ឱ្យ​រីក​ចម្រើន​ក្នុង​អាជីព​និង​ការ​ រស់​នៅ”។
ក្រោយ​ឮ​ដំណឹង​​ពី​ការ​តែងតាំង​នេះ លោក Carlo Ancelotti ដែល​​​កំពុង​បង្វឹក​ក្រុម Real Madrid និយាយ​សាទរ​​​​ថា​៖ “ខ្ញុំ​ធ្លាប់​បង្វឹក​គាត់ (Seedorf)។ គាត់​មាន​បុគ្គលិកលក្ខណៈ​រឹងមាំ​ហើយ​គាត់​មាន​សមត្ថភាព​គ្រប់គ្រាន់​ក្នុង​ ការ​​ប្រឡូក​ក្នុង​បទ​ពិសោធន៍​ថ្មី​នេះ”។​
Seedorf ​ធ្លាប់​លេង​ឱ្យ​ AC Milan ​១០​ឆ្នាំ​ ពោល​គឺ​ពី​ឆ្នាំ​២០០២​ដល់​២០១២ ​ហើយ​ជួយ​ក្រុម​នេះ​ឱ្យ​ឈ្នះ​ជើងឯក​ Serie A ​២​ដង​ Coppa Italia ​ម្ដង UEFA Champions League ​២​ដង UEFA Super Cup ២​ដង​​និង​ FIFA Club World Cup ម្ដង ​ខណៈ​កាល​នៅ​ Ajax ​និង​ Real Madrid ​ក៏​លោក​ឈ្នះ​ជើងឯក​មិន​ស្ទើរ​ដែរ៕​