Microsoft គ្រោង​​បោះ​ទុនសរុប ២,៦ពាន់​លាន​ដុល្លារ​ដល់ Samsung, Sony … ​ផលិត WP device

យោង​តាម​សារព័ត៌មាន unwiredview ឱ្យ​ដឹង​ថា Microsoft ទំនង​នឹង​បោះ​ទុន​ដល់​ក្រុមហ៊ុន​ទូរសព្ទ​ធំៗ​ច្រើន​ទៀត​ក្រៅ​ពី Nokia ដែល​ខ្លួន​ទើប​បាន​ទិញ ឱ្យ​ក្លាយ​ជា​ដៃគូ​សហការ​ស្អិតល្មួត​ក្នុង​ការ​ផលិត hardware បំពាក់ mobile OS (Windows Phone) របស់​ខ្លួន។ ទឹកប្រាក់​ដែល Microsoft គ្រោង​បញ្ចេញ​សរុប​មាន ២,៦ពាន់​លាន​ដុល្លារ​អាមេរិក សម្រាប់​ផ្គាប់​ឱ្យ​ក្រុមហ៊ុន​ល្បីៗ​ដូច​ជា Samsung, Sony, Euawei និង​ក្រុមហ៊ុន​មួយ​ចំនួន​ផ្សេង​ទៀត។

ក្នុង​នោះ Microsoft បោះ​ទុន​ឱ្យ Samsung ចំនួន ១,២ពាន់​លាន​ដុល្លារ ឱ្យ Sony ០,៥ពាន់​លាន​ដុល្លារ ឱ្យ​ Huawei ០,៦ពាន់​លាន​ដុល្លារ និង​ក្រុមហ៊ុន​ផ្សេងៗ​ប្រមាណ ០,៣ពាន់​លាន​ដុល្លារ​អាមេរិក។

ត្បិត Microsoft ឥឡូវ​នេះ​ពង្រឹង​ខ្លួន​លើ​ការ​អភិវឌ្ឍន៍​ផ្នែក hardware ទូរសព្ទ​ដោយ​បាន​ទិញ​យក Nokia ក្ដី ក្រុមហ៊ុន Software យក្ស​របស់​អាមេរិក​នេះ នៅ​តែ​មាន​មហិច្ឆតា​បន្ត​ពង្រីក​សក្ដានុពល​លើ​ចំណែក​ទីផ្សារ OS របស់​ខ្លួន​ដោយ​ជ្រើសរើស​ក្រុមហ៊ុន​ទូរសព្ទ​លំដាប់​កំពូលៗ​មួយ​ចំនួន​មក​ សហការ​ធ្វើ​ជា​ដៃគូ​ផលិត hardware ឱ្យ​ខ្លួន​ថែម​ទៀត។
អត្ថបទ៖ Microsoft ​​ទិញ​ផលិតផល ​និងសេវាកម្ម​ Nokia ដើម្បី​ពង្រីក​​​​ទីផ្សារ
មុន Microsot ទិញ​ផ្នែក​នៃ Nokia ដែល​មាន​ទាំង​ផលិតផល និង​សេវាកម្ម ក្រុមហ៊ុន Software យក្ស​នេះ​ធ្លាប់​បាន​ចំណាយ ១ពាន់​លាន​ដុល្លារ​ក្នុង​មួយ​ឆ្នាំ​ឱ្យ​ទៅ​ក្រុមហ៊ុន Nokia ដើម្បី​ផលិត device របស់​ខ្លួន​ដំណើរការ​ដោយ​ប្រព័ន្ធ​ប្រតិបត្តិការ Windows Phone រួច​មក​ហើយ។ ក្រោយ​ពី​បាន​ទិញ Nokia ឥឡូវ Microsoft បាន​ក្ដាប់​ចំណែក​ទីផ្សារ device ដែល​ប្រើ Windows Phone តាម​រយៈពេល Smartphone ស៊េរី Lumia រហូត​ដល់ ៩០% ឯណោះ។
ទន្ទឹម​នោះ Nokia ដែល​ជា​ក្រុមហ៊ុន​រណប​របស់ Microsoft ស្រាប់​តែ​មាន​ចចាមអារ៉ាម​មក​ថា នឹង​មាន​ចង្វាក់​ផលិតកម្ម​ដាច់​ដោយ​ឡែក​របស់​ខ្លួន ផលិត​ទូរសព្ទ​បំពាក់ Android OS៕